Яшил пиёз, одатда халқ орасида “кўк” пиёз деб аталадиган бу сабзавот, кўз саломатлиги учун катта фойда келтиради. А витаминига бой бўлган яшил пиёз кўз шох пардасини мустаҳкамлайди ва кўриш пигментининг меъёрий даражасини сақлаб туришга ёрдам беради. Бу эса кўзнинг тиниқ кўришини ва ёруғликка сезувчанлигини таъминлайди.
Унинг таркибида лютеин ва зеаксантин каби кўз учун муҳим антиоксидант пигментлар мавжуд. Ушбу моддалар кўз ҳужайраларини эркин радикаллар ва ультрабинафша нурлардан ҳимоя қилади, ёшга боғлиқ кўз касалликларининг, жумладан, катаракта ва макула дегенерацияси каби касалликларнинг ривожланиш хавфини камайтиради.
Бундан ташқари, яшил пиёзда C витамини ҳам мавжуд бўлиб, бу витамин кўз тўқималарининг соғломлигини сақлашда муҳим роль ўйнайди. C витамини томир деворларини мустаҳкамлайди, бу эса кўз ичидаги қон айланишини яхшилайди ва кўзнинг доимий равишда кислород билан таъминланишини қўллаб-қувватлайди.
Бу пиёзнинг яна бир фойдали хусусияти шундаки, у бета-каротинни ўз ичига олади. Бета-каротин организмда А витаминига айлантирилади ва кўзнинг қоронғида кўриш қобилиятини яхшилайди. Шу билан бирга, А витамини шох парда қуришининг олдини олади, бу эса кўз қуруқлигидан азият чекадиганларга айниқса фойдалидир.
