Бугунги кунда Нидерландия қишлоқ хўжалиги соҳасида илғор агроинноватсиялар ва барқарор технологияларни кенг жорий этиш орқали глобал миқёсда етакчи ўринда турибди. Мамлакат аграр сиёсатининг марказида “кўпроқ маҳсулотни камроқ ресурс эвазига олиш” тамойили туради.
Нидерландиялик олимлар томонидан ишлаб чиқилган вертикал деҳқончилик иншоотлари орқали ёпиқ муҳитда сунъий ёруғлик, автоматик суғориш ва CO₂ мувозанатини назорат қилиш асосида йилнинг исталган фаслида юқори сифатли экинлар етиштирилмоқда. Бу технология ер майдони танқис бўлган ҳудудлар учун айниқса долзарб бўлиб, шаҳар атрофида жойлашган “урбан фарм”лар орқали аҳолининг озиқ-овқат хавфсизлигини таъминлаш имконини бермоқда.
Шунингдек, акваферма тизимлари — яъни балиқ етиштириш билан гидропоник усулда ўсимлик парваришини бирлаштирган ёпиқ циклдаги агроиншоотлар кенг жорий қилинган. Бу нафақат сувдан тежаб фойдаланиш, балки чиқиндисиз ишлаб чиқаришни йўлга қўйиш имконини беради.
Мамлалатда агродроне ва АИ (сунъий интеллект) ёрдамида дала мониторинги технологияси ҳам фаол ривожланмоқда. Замонавий дронлар термал камера ва мултиспектрал кўриш тизимлари орқали ер ости намлиги, ўсимлик саломатлиги ва зараркунандалар тарқалишини аниқлаб, фермерларга аниқлик асосида тавсиялар беради.
Бундан ташқари, Wageningen университети етакчилигида ишлаб чиқилган “қайта тикланувчи иссиқхона” (Circular Greenhouse) лойиҳаси доирасида иссиқхоналар энергия тежамкор, сув сарфини 90 фоизгача камайтирувчи ва чиқиндиларсиз экотизимга эга қилиб лойиҳаланмоқда.
