Тошкентда “AgroExpo Uzbekistan 2025” халқаро кўргазмаси бўлиб ўтади. Жорий йилнинг 26–28 ноябрь кунлари пойтахтимизда “Uzexpocentre” мажмуасида “AgroExpo Uzbekistan 2025” халқаро қишлоқ хўжалиги кўргазмаси ўтказилади.
Мазкур анъанавий кўргазма Ўзбекистоннинг аграр тармоғида замонавий технологияларни жорий этиш, сувни тежовчи ускуналарни тарғиб қилиш, шунингдек ҳосилдорлик ва қайта ишлаш соҳасидаги инновацион ечимларни намойиш этиш мақсадида ташкил этилмоқда.
Ушбу нуфузли тадбирда Ўзбекистон билан бир қаторда Германия, Туркия, Италия, Хитой, Жанубий Корея, Исроил ҳамда қўшни давлатлардан юзлаб компаниялар иштирок этиши кутилмоқда. Кўргазмада қишлоқ хўжалиги техникаси, иссиқхона ускуналари, ўсимлик етиштириш, чорвачилик, қайта ишлаш ва совуткичли омбор тизимлари бўйича илғор технологиялар тақдим этилади.
Мутахассисларнинг таъкидлашича, “AgroExpo Uzbekistan 2025” кўргазмаси халқаро ҳамкорликни кенгайтириш, янги инвестиция лойиҳаларини шакллантириш ҳамда аграр соҳада инновацияларни амалиётга татбиқ этишда муҳим платформа бўлиб хизмат қилади.
Кўргазма доирасида амалий семинарлар, бизнес-форумлар ва маҳсулот тақдимотлари ҳам ташкил этилиши режалаштирилган.
