Сабзи етиштиришда тупроқ намлиги суғоришдан олдин 70-75% даражада бўлиши лозим. Кечки сабзи асосан июнь охири ва июль бошларида сепилади, илдизмева шаклланиши эса куздаги салқин кунларга тўғри келади.
Уруғлар яхши ўсиб чиқиши учун, сепилгандан сўнг 2-3 кун давомида марза қорайгунча сув қўйилади, сўнг яна уруғ суви берилади.
Тупроқ намини ҳисобга олган ҳолда, суғориш муддатини бир суткадан оширмаслик тавсия этилади. Сабзи 3-4 марта суғорилганда ниҳоллар барча қаторларда кўрина бошлайди.
Сентябргача ҳар 7-8 кунда, кузда эса 10-12 кун оралиқда суғориш талаб этилади. Сизот суви чуқур жойлашган ерларда мавсум давомида 11-12, юза участкаларда эса 6-8 марта суғориш етарли бўлади.
Суғориш меъёри тупроқ-иқлим шароитларига кўра 6200 – 10900 м³/га оралиғида бўлади. Тўғри суғориш ҳосилдорликни оширишда муҳим аҳамиятга эга.
